СМОТРЕТЬ ВИДЕО - Акафист преподобному Иоанну Лествичнику

СКАЧАТЬ ДЛЯ ПЕЧАТИ Акафист преподобному Иоанну Лествичнику

.

Акафист

преподобному отцу нашему

Иоанну Лествичнику

 

Кондак 1

Избранный угодниче Божий, святым житием и подвиги своими, яко лучезарного света сиянием мир озаривый и лествицу духовнаго восхождения нам оставивый, песенными похвалы ублажаем тя, великий Иоанне, и молитвенный вопль от сердца нашего тебе возносим: огради нас своим молитвенным предстательством от бед и зол душевных и телесных и из мрака греховнаго по лествице добродетелей возведи нас к незаходимому Солнцу правды, да зовем ти:

Радуйся, Иоанне Лествичниче, учителю премудрый.

 

Икос 1

Ангел в телеси, пустынный житель и чудотворец явился еси, богоносе отче наш Иоанне: постом, бдением, молитвою небесная дарования приим, исцеляеши недуги душевныя и телесныя верою притекающих ти. Мы же обретше твоя Божественныя добродетели, яко Божественную лествицу, к Небеси возводящую нас, умиленно глаголем ти сице:

Радуйся, жительство на небеси обретый.

Радуйся, неисчерпаемых благ насытивыйся.

Радуйся, достойное воздаяние за подвиги и труды приявый.

Радуйся, унаследовавый Царство Небесное.

Радуйся, себе яко непорочную и добровольную жертву Великому Архиерею–Богу принесый.

Радуйся, на гору Синайскую тело свое вознесый.

Радуйся, кротость аки начальницу добродетелей возлюбивый.

Радуйся, выну умом созерцающий Бога невидимого.

Радуйся, Иоанне Лествичниче, учителю премудрый.

 

Кондак 2

Видяще тя, отче Иоанне, от юных лет совершенством разума старцу подобна, обаче в послушание духовному наставнику всего себе вверившаго и малолетнему дитяти уподобившагося, яко, меньшаго из братии себе мня, смиренным иноком оставался еси, научаемся разумом своим не надмеватися, но паче смирению и послушанию навыкати непрестанно благодарно взывая к Богу: Аллилуия.

 

Икос 2

Разумеюще тя умного светильника вселенней, прославляем тя, отче преподобне, ты бо, слез твоих теченьми пустыни безплодное возделав, и иже из глубины воздыханьми во сто трудов уплодоносив, молишь присно Христа Бога за ны – чада твоя. Темже предстательством твоим пред Господом нашим Иисусом Христом и Его Пречистой Материю хранимыя, благодарно вопием ти:

Радуйся, небесную простоту возлюбивый.

Радуйся, благолепным смиренномудрием себе украсивый.

Радуйся, яко, смиряя себе ради Бога, своим любомудрием не возносился еси.

Радуйся, яко кротость, украшенную смирением, аки учительницу добродетели, возлюбил еси.

Радуйся, яко дух гордости и вольномыслия от себе отсекл еси.

Радуйся, яко волю свою воле наставника своего покорил еси.

Радуйся, яко самоугодие в себе истребил еси.

Радуйся, яко, ведомый наставником своим, безбедно опасную пучину страстей прешел еси.

Радуйся, Иоанне Лествичниче, учителю премудрый.

 

Кондак 3

Силою свыше облеклся еси, блаженне Иоанне, ибо, оставив мирское житие и книжною мудростию обогатив разум свой, смиренным иноком пребыл еси, возлюбив же небесную простоту, не превозносился еси своим любомудрием, но смирил себе, выну взывая к Богу: Аллилуиа.

 

Икос 3

Имея сердце чистое и ум, освященный богомыслием, ты от юности своей предуготовал еси себе к великому служению Церкви Христовой. Сие же предузнав боговдохновенные отцы и прорекоша сия дивная о тебе. Мы же, исполнение проречений сих зряще, умиленно взываем ти:

Радуйся, на двадесятом году жизни своея пострижение во иночество от руки наставника своего преподобнаго Мартирия приемый.

Радуйся, яко великий Анастасий преподобному Мартирию рече о тебе: «о, авво, ты постригл еси игумена Синайския горы».

Радуйся, яко при пострижении авва Стратигий великое светило вселенныя тя предузна.

Радуйся, яко преподобный Иоанн Савваит омы нози твои и облобыза руку твою, яко грядущу игумену Синайския горы.

Радуйся, избранниче Божий предивный.

Радуйся, подвижниче доблий и пречудный.

Радуйся, смирением, кротостью, послушанием и прочими иноческими добротельми отцев пустынножителей удививый.

Радуйся, светильниче вселенную всю ученьми твоими просветивый.

Радуйся, Иоанне Лествичниче, учителю премудрый.

 

Кондак 4

Бурею скорби одержим был еси, отче Иоанне, егда духовный отец твой и наставник Мартирий заверши земное житие свое. Осененный же его благословением и святыми молитвами, отшед на осьмь поприщ от храма в пустынное место, Фóла именуемое, в безмолвии и уединении пребывал еси, глас богохваления вознося: Аллилуиа.

 

Икос 4

Слышав слово, реченное апостолом Павлом, яко оружия воинства нашего не плотская, но сильна Богом на разорения твердем, постом, молитвою и богомыслием на брань противу врага вооружився, сим оружием пленил еси свой разум в послушание Христово и вшел еси в радость Господа твоего. Мы же, взирая на постнические подвиги и труды твоя, взываем ти сице:

Радуйся, девятьнáдесять лет в послушании своему духовному отцу пребывший.

Радуйся, яко, распаленный огнем Божественныя любве, четы́редесять лет от иночества своего в пустыннем житии подвизавыйся.

Радуйся, пустынниче, изобильно дарами благодатными преисполненный.

Радуйся, горлице пустыннолюбивая, хвалебный глас Богу возносящая.

Радуйся, на плоть, мир и диавола вооруживыйся.

Радуйся, оружием духовным сих врагов славно победивый.

Радуйся, достигнувый глубины христианскаго смирения.

Радуйся, восшедый на высоту духовнаго совершенства.

Радуйся, Иоанне Лествичниче, учителю премудрый.

 

Кондак 5

Боготечная звезда, небо церковное крася́щая был еси отче. Проходя бо путь пустыннаго жития, многократно удалялся в тесную пещеру и, вознося ум и сердце свое к Богу, в молитвенном воздыхании и рыдании из очей своих источал еси покаяния слезы, непрестанно вопия: Аллилуиа.

 

Икос 5

Видя оком умным и разумом немятежным в пустынном безмолвии всея вселенныя лéпоту и величие Творца и Зиждителя оныя Бога, возгорелся еси любовию к Создателю, и пребывая во плоти, ангелам безплотным уподобился еси, сего ради взываем ти:

Радуйся, яко бегая мира и всего яже в мире, погасил еси в себе пламень плотския страсти.

Радуйся, яко постом и бдением мертву соделал еси плоть свою противу объядения и чревоугодия.

Радуйся, яко расточив богатство убогим и милостыню творя, избегл еси сребролюбия.

Радуйся, яко трудолюбием и памятованием о смерти отгнал еси от себе празднолюбие и леность.

Радуйся, яко сети и узы всякаго пристрастия и чувственных похотей разрешил еси.

Радуйся, яко навыкнув послушанию, гнев и раздражение препобедил еси.

Радуйся, яко уединением и безмолвием отбегл еси тщеславия.

Радуйся, яко сердцем чистым узрел еси Бога.

Радуйся, Иоанне Лествичниче, учителю премудрый.

 

Кондак 6

Проповедует пустыня Синайская чистое и святое житие твое, подвиги и труды твоя, имиже и исплел еси себе венец добродетелей, имиже и Христу Богу угодил еси. Мы же, словеса сплетая в похвалу тебе, помянем источницы воднии, ихже очи твои изведосте, плач бо по Бозе омывает всякую нечистоту, и келию твою, юже молитвы твоя и бдения содеяша рай небесный, идеже вкупе со ангелы воспевал: Аллилуиа.

 

Икос 6

Возсия в душе твоей истиннаго боговедения свет и дар прозрения душевных немощей человеческих тебе даровася. Тем же и явился еси наставник многих на путь жизни вечныя, врачуя и исцеляя до днесь язвы и струпи невидимыя к твоей прибегающих помощи и восхваляющих тя сице:

Радуйся, яко явлением твоим ученика твоего Иоанна, спавшаго под великим камнем и от падения сего и смерти дивно спасл еси.

Радуйся, яко некоего брата от овладевшего им блуднаго беса молитвою твоею избавил еси.

Радуйся, слова Божия сладковещанный учителю.

Радуйся, закона Божия скрижале одушевленная.

Радуйся, наставниче, грешных к небесем направляяй.

Радуйся, свещниче, любовию к Богу и ближним светяй.

Радуйся, гусле, услаждающая благочестивыя чувства.

Радуйся, свиреле, утешающая пасомые тобою словесныя овцы.

Радуйся, Иоанне Лествичниче, учителю премудрый.

 

Кондак 7

Хотя посрамити тя, зложелатели твои суесловом и лжецом именоваху тя, ты же, показуя, яко вся можеши о укрепляющем тя Христе, печать молчания положил еси на уста своя и лето едино ни единогоже слова рекл еси. Видя сие, поносившия тя, познаша, яко не подобает заграждати приснотекущий источник воды живыя, сами же моляху, да отверзеши богоглаголивая уста твоя. Ты же, приклонився к прошению их, воззвал еси Богу: Аллилуиа.

 

Икос 7

Новый Моисей явился еси, егда противу воли твоея поставлен был в начальника Синайския обители. Прияв же жезл игумена, духом своим приблизился еси к горе Божией и чрез восхождение ума получил еси богоначертанный закон, темже вопием ти:

Радуйся, яко смирением и незлобием своим поносящия тя студа исполнил еси.

Радуйся, яко молением их богоглаголивая уста своя отверзл еси.

Радуйся, яко злословящих тя благословлял еси.

Радуйся, яко за обидящих тя молился еси.

Радуйся, потаенный светильниче, дивно на высоту поставленный.

Радуйся, от твоих бо уст, якоже светлость огня, возсиявшая, благодать вселенную просвети.

Радуйся, путеводителю благоискуссный, сущих во тьме греха словесных заблуждших овец, на путь спасения ко Христу призывающий.

Радуйся, избранниче Божий, достойно во игумена Синайския обители поставленный.

Радуйся, Иоанне Лествичниче, учителю премудрый.

 

Кондак 8

Странники, числом яко шестьсот, малому времени минувши по поставлении преподобнаго Иоанна во игумена, приидоша в Синайскую обитель и егда тии седоша за трапезу, явися неведомый муж, в белую одежду одеянный, начальствующий при трапезе. Разошедшимся странником, егда седоша за трапезу служащии, чудный сей муж не обреaтеся. Недоумевающим о сем иноком преподобный Иоанн рече: «не ищите туне, сам бо святый пророк и законодавец Моисей послужил в своем сем месте». Изýмлени же иноцы благоговейно возопиша к Богу: Аллилуиа.

 

Икос 8

Всею мыслию в молитвенном делании возносяйся к Богу, егда святую землю постиже сухость великая и бездождие, ты, приклонился к воплю жителей сея земли, и помолился еси Богу о ниспослании дождя. Егда же от молитвы престал еси, абие бысть дождь велий, землю изсохшую напоивый и сотворивый ю плодоносну, людие же прославиша тя, дивнаго молитвенника своего и чудотворца, сице:

Радуйся, по Божию изволению во игумена Синайския обители избранный.

Радуйся, видения во обители сей святаго пророка и законодавца Моисея сподобивыйся.

Радуйся, яко молитвою твоею дождь на жаждущую землю извел еси.

Радуйся, яко обильно напоив ю, плодоносну соделал еси.

Радуйся, силою молитв твоих пророку Илии подобный.

Радуйся, чудес источниче неисчерпаемый.

Радуйся, образе евангельския кротости и смирения.

Радуйся, оргáне, славу Божию возвещаяй.

Радуйся, Иоанне Лествичниче, учителю премудрый.

 

Кондак 9

Всем был еси вся, якоже и святый Павел, да всяко некия спасеши. Того ради святый Иоанн, игумен Раифския обители, в послании своем моли тя, яко общаго всех отца, старейшаго над всеми, подвиги своими и разумом учителя всех превосходящаго, явственне начертати, что есть потребно и прилично монашескому житию. Ты же, аще и почитал еси себе непотребна на великое дело сие, обаче, послушания ради, со страхом и усердием приступил еси к сему делу. Призывая же Бога на помощь себе, воззвал еси Ему: Аллилуиа.

 

Икос 9

Вити́йство немощнаго ума человеческаго не возможет достойно восхвалити тя, блаженне Иоанне, за едино токмо великое творение твое, «Лествицею» нареченное, но почитая память твою, движимыя любовию, елико мощно есть немощным силам нашим, приносим ти сицевая:

Радуйся, вождю благоискусный всех, образ ангельскаго жития себе избравших.

Радуйся, яко и соименный тебе святый Иоанн, начальник Раифския обители, высочайшим по добродетели нарицаше тя.

Радуйся, яко, по смирению своему, дело, на тя возлагаемое, почитал еси превосходящим силы твои.

Радуйся, яко со страхом и великим усердием приступил еси к исполнению его.

Радуйся, послание святаго Иоанна яко повеление от самаго Господа приял еси.

Радуйся, яко чтущих книгу твою смиренно в ответном послании твоем молил еси, аще что обрящут в ней полезное, вменити то не тебе, но начальнику твоему.

Радуйся, яко творение твое, «Лествицею» нареченное, воистину связует небо с землею, земное возводя к небесному.

Радуйся, яко в «Лествице» своей тридесять ступéней самосовершенствования положил еси во образ тридесяти лет возраста Христова.

Радуйся, Иоанне Лествичниче, учителю премудрый.

 

 

Кондак 10

Спасения хотящих достигнути писание твое, «Лествицею» именуемое, наставляет к трудам, самоотвержению и подвигам крепким, омывает же нечистоты́ греховныя, страсти и пороки искореняя, и сим образ Божий в человеке восставляет. Восходя по «Лествице» твоей грешник обретает спасительный путь покаяния, поучается непрестанно пети Богу: Аллилуиа.

 

Икос 10

Стена греха, воздвигнутая врагом спасения нашего, «Лествицею» разрушается: по ней бо идущий чрез борьбу со страстьми безстрастия достигает и молчанию научается, созерцая, аки в зерцале, райская благая, и приобщается миру небесному. Тако видя в твоем творении воистину лествицу утвержденну, возводящую до врат небесных, в похвалу взываем ти сице:

Радуйся, проповедниче покаяния.

Радуйся, учителю чистоты и безстрастия.

Радуйся, облаче, источивший нам росу спасительнаго учения.

Радуйся, добрый наставниче и путеводителю ко спасению.

Радуйся, яко первою ступенью лествицы отречение от земных пристрастий поставил еси.

Радуйся, на высоте ея союз трех добродетелей веры, надежды и любве показал еси.

Радуйся, яко «Лествица» возводит душу от земли к небесней славе.

Радуйся, яко идущим по ней отверзается дверь в Царство Небесное.

Радуйся, Иоанне Лествичниче, учителю премудрый.

 

Кондак 11

Пение хвалебное воспеваем ти, преподобне Иоанне, прославляя чистое житие твое, безмолвие высокое, смирение нелицемерное, молитву непрестанную, воздержание совершенное и чистоту души боголюбезную: ты же, всеблаженне, помози и нам подражати твоим добродетелем, да возможем богоугодно пети Создателю нашему: Аллилуиа.

 

Икос 11

Светлаго солнца закату уподобися преставление твое от земного жития, преподобне Иоанне: наставив бо братию Синайския обители и утешив брата своего Георгия, одержимаго печалию о разлуке с тобой, тихо отошел еси ко Господу. Ублажая праведную кончину твою, взываем ти сице:

Радуйся, яко от тела разрешився, душею твоею воспарил еси в селения небесная.

Радуйся, благий рабе и верный, вшедый в радость Господа твоего.

Радуйся, яко блаженную безконечную жизнь и веселие неизреченное наследовал еси.

Радуйся, «Лествицу», возводящую иноков и всех нас на высоту совершенства духовнаго, тобою писанную в наследие нам оставивый.

Радуйся славу Триипостаснаго Божества лицем к лицу зрящий.

Радуйся, лучу безсмертия, богосветлый и немерцающий.

Радуйся, свещé, огнем любве Божественныя горящая.

Радуйся, горнило злато молитвы очищающее.

Радуйся, Иоанне Лествичниче, учителю премудрый.

 

Кондак 12

Благодать Божия обильно излияся во устах твоих, преподобне Иоанне. Премудрым словом своим был еси иноком и всем приходящим к тебе наставник: в писании твоем, «Лествицею» нарицаемом, образ и правила благочестиваго жития всем преподал еси, во ином же писании твоем «К пастырю» чины пастырския уяснил еси. Темже, молися о нас, святый отче, да дух твоего разума и благочестия почиет на нас, во еже сподобитися купно с тобою пети Богу: Аллилуиа.

 

Икос 12

Поюще твое святое, добродетельное и подвижническое житие, емуже и небожители дивятся, мы, земнороднии, имуще тя теплаго молитвенника и предстателя нашего пред Богом, величаем тя благохвалениями сицевыми:

Радуйся, светлых селений райских обитателю.

Радуйся, помраченныя и спящия совести нашея добрый пробудителю.

Радуйся, к Царствию Божию верных возводящий.

Радуйся, Божий гласе, пречудно нам возгремевший.

Радуйся, чудес многоценное сокровище.

Радуйся, премудрости Божия приснотекущий источниче.

Радуйся, яко Боговидец Моисей с горы Синайския, образ лествичнаго восхождения миру даровавый.

Радуйся, иноческих добродетелей светлый образе.

Радуйся, Иоанне Лествичниче, учителю премудрый.

 

Кондак 13

О преподобне отче Иоанне! Приими малое моление сие, от нас недостойных тебе приносимое, и испроси нам у Господа Бога духа премудрости и страха Божия, да ходим путем Христовых заповедей и по лествице духовнаго восхождения достигнем обителей райских, идеже прославим Пресвятую Троицу, поюще: Аллилуиа.

Сей кондак глаголется трижды.

Также чтется Икос 1: Ангел в телеси:

И паки кондак 1: Избранный угодниче Божий:

 

 

Икос 1

Ангел в телеси, пустынный житель и чудотворец явился еси, богоносе отче наш Иоанне: постом, бдением, молитвою небесная дарования приим, исцеляеши недуги душевныя и телесныя верою притекающих ти. Мы же обретше твоя Божественныя добродетели, яко Божественную лествицу, к Небеси возводящую нас, умиленно глаголем ти сице:

Радуйся, жительство на небеси обретый.

Радуйся, неисчерпаемых благ насытивыйся.

Радуйся, достойное воздаяние за подвиги и труды приявый.

Радуйся, унаследовавый Царство Небесное.

Радуйся, себе яко непорочную и добровольную жертву Великому Архиерею-Богу принесый.

Радуйся, на гору Синайскую тело свое вознесый.

Радуйся, кротость аки начальницу добродетелей возлюбивый.

Радуйся, выну умом созерцающий Бога невидимого.

Радуйся, Иоанне Лествичниче, учителю премудрый.

 

Кондак 1

Избранный угодниче Божий, святым житием и подвиги своими, яко лучезарного света сиянием мир озаривый и лествицу духовнаго восхождения нам оставивый, песенными похвалы ублажаем тя, великий Иоанне, и молитвенный вопль от сердца нашего тебе возносим: огради нас своим молитвенным предстательством от бед и зол душевных и телесных и из мрака греховнаго по лествице добродетелей возведи нас к незаходимому Солнцу правды, да зовем ти:

Радуйся, Иоанне Лествичниче, учителю премудрый.

 

Молитва ко преподобному Иоанну Лествичнику

О преподобне отче Иоанне, дивный угодниче Божий и великий светильниче церкве Христовой, святым житием своим просиявый и лествицу духовнаго восхождения нам оставивый. Буди нам ко всякому делу благу помощник и по лествице духовнаго восхождения буди нам вождь ко спасению. Се ныне страстьми греховными обуреваемы есмы: дух лености и праздности, дух ненависти и злобы, дух нерадения и празднословия одержит нас. Ты же в земном житии твоем победил еси вся плотския страсти и избранным селением Духа Святаго соделался еси, ныне же, на небеси вселивыйся велие дерзновение пред Господом Богом имаши. Того ради молимся тебе: по лествице духовнаго восхождения доведи нас к вратам небесным и истинному во гресех покаянию научи нас. Умоли Господа Бога, да простит нам вся согрешения наша вольная и невольная, во временных же нуждах дарует нам благовременную помощь, да наречемся сынами Вышняго и прославим пресвятое имя Его, Отца, и Сына, и Святаго Духа, ныне, и присно, и во веки веков. Аминь.

 

Тропарь, глас 1

Пустынный житель и в телеси Ангел и чудотворец явился еси, богоносе отче наш Иоанне, постом, бдением, молитвою Небесная дарования приим, исцеляеши недужныя и души верою притекающих ти. Слава Давшему ти крепость, слава Венчавшему тя, слава Действующему тобою всем исцеления.

 

Кондак, глас 4

На высоте Господь воздержания истинна тя положи, якоже звезду нелестную, световодящую концы, наставниче Иоанне, отче наш.

 

Величание

Ублажаем тя, преподобне отче наш Иоанне, и чтим святую память твою, наставниче монахов и собеседниче ангелов.