О, преподобне отче Иоанне, дивный угодниче Божий и великий светильниче Церкви Христовой, святым житием своим просиявый и лествицу духовнаго восхождения нам оставивый.
Буди нам ко всякому делу благу помощник и по лествице духовнаго восхождения буди нам вождь ко спасению.
Се ныне страстьми греховными обуреваемы есмы: дух лености и праздности, дух ненависти и злобы, дух нерадения и празднословия одержит нас.
Ты же в земном житии твоем поборол еси вся плотския страсти и избранным селением Духа Святаго соделался еси, ныне же, на небеси вселивыйся, велие дерзновение пред Господом Богом имаши.
Того ради молимся тебе: по лествице духовнаго восхождения дозведи нас к вратам небесным и сущим во гресех истинному покаянию научи нас.
Умоли Господа Бога, да простит нам вся согрешения наша вольная и невольная, во временных же нуждах дарует нам благовременную помощь,
да наречемся сынами Вышняго и прославим пресвятое имя Его, Отца, и Сына, и Святаго Духа, ныне, и присно, и во веки веков.
Аминь.

.